Baldintzazko perpausek bi zati dituzte: baldintza (BA- marka daramana) eta ondorioa.
Hiru baldintza mota bereizten dira euskaraz:
1.- Ez-alegiazko baldintza (erreala). Oso posible da baldintza gertatzea eta, hortaz, baita ondorioa ere:
1. Egoera: Zerua begiratuz gero, hodei beltzak ikusten ditugu.
Euria egiten badu, blai eginda helduko gara etxera.
2. Egoera: Ana oso ikasle argia da. Normalean langilea da baina azken aste honetan ez du behar beste lan egin.
Saiatzen bada, Anek ikasketak amaitzea lortuko du.
2.- Orain-geroaldia (hipotetikoa). Baldintza nekez bete daiteke; hortaz, ondorioa ere nekez gertatuko da.
3. Egoera: Zerua begiratzen badugu, oskarbi dago.
Euria egingo balu, blai eginda helduko ginateke etxera.
4. Egoera: Ana oso ikasle argia da, baina baita oso alferra ere; ez du piperrik jotzen.
Saiatuko balitz, Anek ikasketak amaitzea lortuko luke.
3.- Iraganekoa (irreala). Baldintza iraganean gertatu ez den egoera hipotetiko bat da eta, hortaz, ondorioa ere ez da gertatu.
5. Egoera: Atzoko kontuaz ari da; atzo ez zuen euririk egin.
Euria egin (izan) balu, blai eginda helduko ginatekeen etxera.
Euria egin (izan) balu, blai eginda helduko ginen etxera.
6. Egoera: Ana oso ikasle argia da, baina baita oso alferra ere; ez zuen piperrik jo eta, beraz, suspenditu egin du.
Saiatu (izan) balitz, Anek ikasketak amaitzea lortuko zukeen.
Saiatu (izan) balitz, Anek ikasketak amaitzea lortuko zuen.